Ginkumpirmar sang Capiz Police Provincial Office nga nag negatibo ang 38 tanan ka mga police officers sini sa ginpatigayon nga ‘Surprise Drug Test’ sang Hunyo 30, 2025.
Sa interview sang Bombo Radyo kay Police Captain Merry Chris Dela Cruz, Police Information Officer sang Capiz Police Provincial Office, iya ginpahayag nga ginaluaman na ini sang ila talatapan bangud nga hugot nga ginadumilian ang mga katapo sang kapulisan nga maulamid sa sini nga buluhaton ilabi nagid sa mga opisyales.
Dugang pa sini, nga ang nasambit nga drug test ang padayon nga ginapatigayon kada tuig.
Sa pihak nga bahin, gintuad man ni Dela Cruz nga sa tion ang isa ka pulis magpositibo sa drug test, liwat ini nga ipaidalom sa confirmatory test kag kun magpositibo liwat, diri kag pagakasuhan na ini sang kaso sa paglapas sa Republic Act 9165 ukon ‘Comprehesive Dangerous Drugs Act of 2002’ kag posible ini nga ma-dismiss sa serbisyo.
Samtang, ginakabug-usan sang 18 ka Police Commisioned Officers nagikan sa Provincial Head Quarter; 17 ka mga Chief of Police sang magkatuhay nga police stations; duha ka Mobile Force Commander kag isa ka Platoon Leader ang nagpaidalum sa nasambi nga ‘Surprise Drug Test’.
Nalipay naman suno sa iya ang Provincial Director sang Capiz Police Provincial Office nga si Police Colonel Albert Tapulao sa nangin resulta sang drug test bangud nga wala sang nagpositibo sa iya sini nga nasakupan.
Pahayag pa ni Dela Cruz, nga isa ini ka aktibidad nga ginapakita ang transparency sa publiko agud bilang mga kapulisan suno sa iya, sila ang dapat masiguro nga wala nagagamit sang ilegal nga droga agud nga pamarisan sang mga pumuluyo nga ila sini nga nasakupan.
