ROXAS CITY -Ginkompirmar ni Mayor Esteban Evan ‘Dodoy’ Contreras nga empleyado sang munisipiyo sang banwa sang Pontevedra ang pasyente nga ginatumod ni Iloilo City Mayor Jerry Treñas nga nagtapo sang COVID-19 sa 8 ka mga medical doctors sang St. Paul’s Hospital.
Ginpahayag ni Contreras nga isa ka 40-anyos nga lalaki ang amo nga persona nga na-confine sa isa ka pribado nga ospital bangud may tubig ang iya nga atay.
Ginapahayag nga gindala ini sa amo nga ospital agud nga ma-operahan.
Ginpanindugan ni Contreras nga wala sang kamatuoran ang pahayag ni Treñas bangud antes gin-operahan ang amo nga pasyente, sa pihak nga una ini nga nag-positibo sa rapid test, makaduha ka beses naman ini nga nag-negatibo sa real-time polymerase chain reaction (RT-PCR) test.
Gindugang pa sini nga wala sang history of travel ang pasyente sa lugar nga tuman nga apektado sang amo nga balatian kag wala sang close-contact sa mga nag-positibo sa nasambit nga sakit.
Ginpanindugan man ni Contreras nga indi direkta nga matudlo ang nasambit nga pasyente nga amo ang nagtapon sa mga medical doctors bangud may yara pa ini sang isa ka pasyente nga kadungan sa sulod sang Intensive Care Unit (ICU).
Samtang sa ginpatigayon nga contact tracing sang nasambit nga banwa, lunsay nagnegatibo sa rapid test ang duha ka himata sang pasyente.
Yara naman sa estable nga kondisyon ang pasyente samtang ginahulat ang resulta sang ikatatlo sini nga RT-PCR test.
