ROXAS CITY – Nagpaathag ang pamunuan sang Municipal Social Welfare and Development Office (MSWDO) sang banwa sang Pontevedra natuhoy sa ila nga pag-release sang social pension sang mga senior citizens sang nasambit nga banwa.
Suno kay MSWD Officer Lynee Tamayo, ang ila una gin-release nga tag-P3, 000 sa mga senior citizen ang para sa 1st kag 2nd quarter sang tuig 2020 bangud ini ang una nga pondo nga nag-abot.
Apang ginpahayag sini nga nag-abot naman ang pondo para sa 3rd kag 4th quarter sang tuig 2019 gani gilayon man nila ini nga gina-asikaso agud mapadasig man ang releasing.
Suno diri nga kun ano ang una nga na-download nga pondo, amo ang ila una man nga ginpaguwa.
Posible suno diri nga duha ka semana matapos ang ila una nga pag-release, ila naman nga igapanghatag ang dugang nga P3, 000 nga social pension para sang nakaligad nga tuig.
Ginpahayag sini nga nagapadayon sa karon ang ila pag-obra sang payroll agud masiguro nga wala sang may mawigit nga benepisyaryo kag tanan ang makabaton sang nasambit nga bulig-pinansiyal.
