Nagpanawagan si Pope Leo XIV nga untaton na ang nagadalom nga “spiral violence” sa Middle East, kasunod sang pag-atake sang Estados Unidos kag Israel sa Iran nga ginsundan sang mga pagbalos sang airstrikes.
Sa iya mensahe sa mga tumuluo sa St. Peter’s Square, nagpaandam ang Santo Papa sa posibilidad sang daku nga trahedya kon indi gilayon mauntat ang tuman nga kinagamo.
Ginpahayag sang Santo Papa nga sa atubang sang pamahog sang isa ka dako nga trahedya, nagapanawagan siya sa tanan nga mga pungsod nga nadalahig nga magdala sang moral nga responsibilidad agud mapauntat ang nagapadayon nga kalakasan antes ini makatuga sang mas daku pa nga kahalitan.
Ang mga pahayag sang Santo Papa nag-abot kasunod sang nagapadayon nga pagbayluhanay sang mga pag-atake sa tunga sang Iran kag US kag Israel, nga nagapautwas sang kahadlok sa posible mas daku nga destabilisasyon sang Middle East kag sang internasyunal nga komunidad.
