Gin-alerto na sang gobyerno sang Pilipinas ang mga katupad sini sa Portugal kag iban pa nga mga pungsod nga lagson kag dal-on pabalik sa Pilipinas si Former Ako Bicol Party List Representative Zaldy Co, nga gindeklarar nga fugitive.
Una na nga ginbuyagyag ni DILG Sec. Jonvic Remulla ang katapusan nga lokasyon sang Co sa Portugal.
Suno kay Remulla, ginpahibalo na ang tanan nga pungsod kag tanan nga sentro sang transnational crimes sa bug-os nga kalibutan angut sa pagkanselar sang passport ni Co.
Gin-ako ni Remulla nga malawig kag mahinay ang proseso kun international law ang pagahambalan, apang suno sa iya, nagapakig-angot sila sa ila mga katupad.
Sa bahin ni Co, una sini nga ginpanginwala ang mga akusasyon batok sa iya kag sa baylo gintudlo si Presidente Ferdinand Marcos Jr. nga ginapahayag yara sa likod sang P100 bilyon nga budget insertions sa 2025 national budget for infrastructure projects, nga gintawag sang Palasyo sang Malacañang nga wala sang basehan kag tanan nga espekulasyon.
Matandaan nga isa si Co sa 16 ka mga akusado sa kaso sang graft kag malversation may kaangtanan sa maanomaliya flood control project sa Oriental Mindoro.
Sa mga kaupod nga akusado ni Co, siyam sa ila ang yara na sa kustodiya sang gobyerno kag nag-ako nga wala sang sala sa Sandiganbayan.
