Indi tili-awan nga klase sang balatyagon ang ginabatyag pagkatapos sang pagselebrar sang holiday ukon ang ginatawag nga post holiday blues.
Sa interview sang Bombo Radyo kay Joeffry Espiritu, Development Management Officer IV kag Information Officer sang Department of Health – Capiz, iya ginpahayag nga ang post holiday blues ang isa ka seryoso nga nga ginabatyag sang tawo nga masami makabatyag sang kasubo ukon pagkadula sang gana.
Suno kay Espiritu, mahimo maka-apekto ang ini nga balatyagon sa emotional, physical kag spiritual sang isa ka tawo mangin sa iya nga daily routine bangud sang iya sini nga balatyagon nga tuman nga kasubo kag disappointment.
Pahayag pa niya, importante nga halungan ang kaugalingon, pamaagi sang pag-ehersisyo, tama nga pagkaon kag pagpahuway.
Nagpanawagan man ang natungdan nga mangin mapinamatyagon sa balatyagon sang iban nga tawo bangud indi tanan may yara sang parehas sang estable nga estado sang paminsaron.
