Plano sang Philippine Ports Authority (PPA) nga mag-hire pa sang mas madamu nga port police officers’ para mabantayan ang tanan nga mga pantalan sa pungsod.
Suno kay PPA General Manager Jay Santiago, ginbuksan na sang ahensiya ang application process para sa mga bag-o nga port police officers kag ginsuguran na ang pagbaton sa mga ini.
Pahayag ni Santiago, dako ang katungod sang mga port police officers sa pagmentinar sang kaluwasan, seguridad, kag kahilwayan sa mga pantalan sa pungsod.
Ang mga ini ang namanduan nga maghatag sang solusyon sa mga epekto sang kalamidad, nagakalain-lain nga aksidente ukon krimen, kag anuman nga pagpamahog sa mga pantalan.
Sa karon, may yara sang 270 aktibo nga port police officers sa dako nga pantalan sa bug-os nga pungsod.
Samtang, ang mga luyag mangin port police officer ang maga-agi sa malawig-lawig kag komprehensibo nga training kaangut sa port operations, criminal law, marksmanship, firearms safety, water search and rescue, kag nagkalain lain nga endurance exercises.
Ang mga aplikante para sa pagiging port police ang kinahanglan mga Filipino citizens, college graduate, nakapasa sa Civil Service Commission ukon Professional Regulatory Commission exams, wala sang dishonorable discharge record nagikan sa militar, police, kag iban pa nga government agencies, kag wala pa na-convict sa anuman nga krimen.
