ROXAS CITY – Nagtuga sang kakugmat sa mga residente sang Mejorada Subdivision, Barangay Inzo Arnaldo Village ang ginaalegar presensiya sang isa ka tikbalang kagab-i.
Sa pagpakig-angut sang Bombo Radyo kay Manang Nene, isa sa nakakita sa ginapatihan tikbalang nga mas mataas ang kataason sini sa normal nga height sang isa ka tawo, sa diin gin-alegar sini nga nakalab-ot pa sa atop ang ulo sini.
Ginlaragway man sang ginang ang inakita nga nagatingkarag nga buhok kag nagatindog sa puno sang kahoy nga kasubong may ginasubaybayan ang amo nga tawo.
Gintuad pa ni Manang Nene sang nagliligad pa nga semana sang nakabatyag na ang mga pumuluyo nga may nagalukso lukso sa ila mga atop kun gab-i apang wala lamang sila makatsansa nga makita kun ano ini.
Natabuan lamang kagab-I nga indi lamang ang nasambit nga ginang kag ang bana sini ang nakakita sang ginapatihan tikbalang kag indi aswang kundi kalakip man ang ila mga kaingud balay.
Ginpahayag sang albularyo nga nagapamulong nga liwat nga magabalik ang tikbalang bangud may yara ini sang gina-abat.
Bangud sa insedente siguraduhon sang mga residente nga matrangkahan ang ila mga pirtahan kag mangin aligmat ang mga kalalakinhan kalakip ang mga tanod nga maga-roving sa lugar agud indi makapanghalit ang ginapatihan tikbalang kun may plano gid man ini nga malain.
