Ginatugyan ni President Ferdinand Marcos Jr. sa iya nga bata nga si House Majority Leader kag Ilocos Norte Representative Sandro Marcos, ang pagsabat sa mga alegasyon natuhoy sa ginaalegar pagbaton sang pondo sang iya nga distrito halin sa Department of Public Works and Highways (DPWH).
Suno kay Palace Press Officer Usec. Claire Castro, nabasa mismo sang presidente ang report sang Philippine Center for Investigative Journalism (PCIJ) nga nagasiling nga kalakip ang distrito ni Sandro sa nagapanguna nga benepisyaryo sang DPWH funds umpisa 2023 tubtob 2025.
Ginsigurado ni Sandro nga handa siya mag-atubang sa mga isyu kag sa hearing sang Independent Commission for Infrastructure subong nga semana.
Ginsiling man ni Castro nga bukas ang Palasyo sa ano man nga lifestyle check sa kongresista kag mangin sa bug-os nga First Family sa tunga sang mga alegasyon sang korapsyon.
