ROXAS CITY – Nakahanda si Presidente Rodrigo Duterte nga paarmasan ang masobra 700 ka mga former rebels nga nagsungka sa mga otoridad pananglitan ipiton ang mga ini sang rebelde nga Communist Party of the Philippines-New Peoples Army (CPP-NPA).
Ini ang ginpasiguro sang sang presidente sa iya nangin mensahe sang ginpangunahan sini ang decommissioning sa 727 ka mga anay miyembro sang Partido ng Manggagawa-Pilipinas/Revolutionary Proletarian Army/Alex Boncayao Brigade – Tabara-Paduano Group (RPM-P/RPA/ABB-TPG) ukon KAPATIRAN sa 3rd Infantry Division (3ID) Philippine Army sa Camp Peralta, Jamindan, Capiz.
Suno kay Duterte, indi malayo nga ipiton ukon hingabuton sang rebelde nga grupo ang mga nagsungka nila nga miyembro rason nga dapat lamang nga mahatagan sang hugot nga seguridad ang mga ini.
Mahibaluan nga pagahatagan sang issued firearms ang mga former rebels matapos ang ila nga training sa 3ID headquarters bilang mga miyembro sang Special Civilian Active Auxiliary.
Mahibaluan nga nagalab-ot sa 337 ka mga armas, assorted explosives kag mga bala ang ginsungka sang mga anay rebelde nga yara na karon sa kustodiya sang mga otoridad.
