ROXAS CITY – Nagapadayon ang manhunt operation sang Bureau of Jail Management and Penology (BJMP) Roxas sa isa sa mga preso sang BJMP-Roxas City Jail, sa Barangay San Jose, sining siyudad, nga nakapalagyo sa nasambit nga presuhan.
Suno sa jail warden sang BJMP-Roxas nga si Atty. Jairus Anthony Dogelio, ginkilala ang nakapalagyo nga inmate nga si Jayson Sta. Maria, nga may yara sang kaso nga Robbery.
Ginpahayag ni Dogelio nga nag-upod sa ‘kitchen boys’ si Sta. Maria kag boluntaryo nga nagbulig sa pagluto sang pagkaon sang iya mga kaupdanan nga preso.
Didto kag nakakuha sang kahigayunan si Sta. Maria nga makapalagyo pinaagi sa pagtaklas sa pader sa ila nga kusina.
Ginapatihan nga nagpalagyo ang nasambit nga inmate matapos iya nahibaluan nga may bag-o na nga karelasyon ang iya nga live-in partner.
