ROXAS CITY – May yara sang pagtaas sa presyo sang baboy sa bahin sang Teodoro Arcenas Trade Center samtang nagahilapit ang paskwa.
Sa interview sang Bombo Radyo kay Roberto Ross Roldan, punong barangay sang Barangay Adlawan, Roxas City kag isa ka meat vendor sang Teodoro Arcenas Trade Center, iya ginpahayag nga ang pagpataas nila sang presyo ang nakabase sa live weight sang baboy nga nagalab-ot na sa P200 to P205 per kilo.
Suno kay Roldan, ang asud-asud nga bagyo nga nag-agi sa probinsya ang isa man sa mga rason sang pagtaas sang presyo bangud sa kabudlay sang transportasyon.
Pahayag pa niya, indi bastante ang supply sang baboy sa probinsya rason nga naga-angkat pa sa iban nga lugar kun sa diin mas barato ang presyo.
Nagpanawagan man ang natungdan nga magbakal sang karne sang baboy sa tama nga lugar kasubong sang Teodoro Arcenas Trade Center agud masiguro ang kalidad kag kaluwasan sang mga makonsumo.
Interviewed by: Bombo Jessa Mae Delos Santos via Bombohanay sa Udto
