ROXAS CITY – Nagapabilin nga wala sang paghulag ang presyo sang bugas sa Teodoro Arcenas Trade Center (TATC).
Sa interview sang Bombo Radyo sa Presidente sang Rice Retailers Association sa TATC nga si Mr. Edilberto Cambe, ginpahayag sini nga wala sang may ginbag-o ang presyo sang mga bugas sumugod nga nagnubo ini sadtong bulan sang Hulyo.
Matandaan nga nagtapyas sang P3.00 sa kada kilo sang bugas sadtong nasambit nga bulan kung sa diin ang presyo sang
Regular Milled Rice – P53.00 nagnubo sang P50.00
Well Milled Rice – P56.00 nagnubo sang P53.00 kag
Imported Rice – P58.00 nagnubo sang P55.00.
Suno kay Cambe, bangud nagahilapit na ang Holiday Season gina-ekspektar nga maganubo pa ang presyo sang bugas bangud padulong na sa harvest season ukon tig-alani.
Ginklaro man sini nga pag-abot sa mga lokal nga bugas manipis ang suplay bangud malaka pa lamang ang mga naga-ani apang ginatib-ong lamang ini sang mga imported nga bugas rason nga nagapabilin nga bastante ang suplay.
Mahibaluan nga nagikan sa banwa sang Panay, Panitan, Dao, kag Maayon, ang mga lokal nga bugas nga ginabaligya sa nasambit nga merkado.
Mensahe ni Cambe sa mga konsumedor indi magkahangawa sa mga huring-huring nga magataas pa ang presyo sang bugas.
