BANGKOK, THAILAND – Ginsuspinder sang Constitutional Court sang Thailand si Prime Minister Paetongtarn Shinawatra sang Martes samtang ginapatigayon ang imbestigasyon sa ginapahayag paglapas sini sa ministerial ethics kaangot sang nangin diplomatic dispute sa Cambodia.
Sa interview sang Bombo Radyo kay Bombo Christella Marielle Vergara, International Correspondent sa Thailand, iya ginpahayag nga ginbaton sang Prime Minister ang desisyon sang korte sa pihak sang kakapungko niya pa lang sa pwesto sa sulod sang kapin isa ka tuig.
Samtang ginapatigayon ang imbestigasyon nga posible magdugay sang pila ka semana ukon bulan, gin-appoint si Deputy Prime Minister Suriya Jungrungreangkit nagikan sa kapareho nga partido ni Shinawatra nga Pheu Thai, bilang temporaryo nga tagdumala sa pungsod.
Kadungan sini, gin-umpisahan man ang hearing sa amay ni Paetongtarn nga si Thaksin Shinawatra bangud sa kaso nga royal defamation ukon pagpang-guba sa dignidad sang monarkiya sang Thailand.
Madugay na nga nagapadyon sa politika sang Thailand ang tensyon sa tunga sang pro-military kag pro-royalist elite batuk sa Shinawatra political dynasty nga madugay na nga ginakabig nga katalagman sa tradisyunal nga katawhay sang pungsod.
Sa tunga sang kontrobersiya, nagapanawagan na ang pila ka mga oposisyon nga magpatigayon sang panibag-o nga eleksyon agud hatagan sang igtalupangod ang krisis sa pulitika.
