Probinsya nakarekord sang 15 ka kaso sang dengue kag 4 ka nagpositibo sa COVID-19 sa una nga semana sang 2024 – Capiz PHO

ROXAS CITY – Nakarekord sang 15 ka kaso sang dengue kag 4 ka nagpositibo sa Corona Virus disease (COVID-19) ang probinsya sang Capiz sa una nga semana sang 2024 ukon humalin Enero 1 tubtob Enero 6, 2024.

Ini ang sandig sa Provincial Weekly Notifiable Diseases Case Bulletin nga ginpaguwa sang Capiz Provincial Health Office.

Sa pahayag ni Mr. Jeoffrey Espiritu, Development Management Officer IV sang Department of Health Capiz suno diri ang nasambit nga kaso sang dengue ang mas mataas sang 87.50% kumparar sa nanligad nga tuig sa kapareho nga panahon nga yara sa 8.

Pila sa ginatan-aw nga rason sa pagtaas sa kaso sang dengue amu ang maulanon nga panahon kag indi malimpyo nga palibot kabangdanan agud magtinir ang mga lamok nga may dala nga balatian nga dengue.

Sa nanligad nga 2023 ang probinsya ang nakabalhag sang 903 ka kaso sang dengue sa diin 5 diri ang napatay nga nagikan sa munisipalidad sang Ivisan, Mambusao, Panay kag Roxas City.

Samtang, sa COVID-19 cases naman may kabug-usan nga numero nga 13,993 ang nagpositibo sa virus, 13,382 ang nakarekober, 598 ang nagkalamatay kag 29 ang aktibo nga kaso.

Kun pagabasehan ang datos sang nanliligad nga tuig, makit-an ang pagnubo sa numero sang mga nagka-COVID bangud kadam-an na sa mga pumuluyo ang bakunado na.

Sa datos sang 2023 notifiable diseases nakarekord ang PHO Capiz sang 5 nga may Acute Flaccid Paralysis (AFP), 14 sa Adverse Event following Immunization, 302 Hand,Foot and Mouth Disease (HFMD) kag 32 ang nabiktima sang Paralytic Shellfish Poisoning.

Ang nasambit nga numero ang sandig sa mga pasyente nga nagapadulong sa ospital ukon rural health unit agud magpabulong.

Padayon naman ang pagmonitor sang PHO-Capiz sa mga nasambit nga balatian.