Nakuha sang probinsya sang Capiz ang ikaduha nga pwesto sa may pinakamanubo nga kaso sang child malnutrition sa bilog nga pungsod, base sa Operation Timbang Plus report sang nagligad nga tuig.
Sa interview sang Bombo Radyo kay Mr. Ayr Altavas, Public Information Officer sang Capiz Provincial Health Office, iya ginpahayag base sa datus may yara sang 2.01% nga stunting rate ang probinsya, nga nagapakita sang manubo nga kaso sang malnutrisyon sa mga kabataan.
Suno kay Altavas, nagapakita lamang ini nga epektibo ang mga programa sang gobyerno probinsyal sa nutrisyon kag ikaayong-lawas sang kabataan.
Dugang pa sini, ang maayo nga koordinasyon sang nagkalain-lain nga sektor kag padayon nga kampanya sa husto nga nutrisyon amo ang isa sa mga rason sa amo nga kadalag-an.
Apisar sang kadalag-an, padayon sa gihapon ang pagpaninghuwa sang probinsya agud mas mapanubo pa gid ang kaso sang malnutrisyon kag mapabaskog ang ikaayong lawas sang mga kabataan.
