ROXAS CITY – Kadungan sa pagkomemorar sang ika-50 anibersaryo sang Martial Law, nagpatigayon man sang silent protest ang progresibo nga grupo Sentrong Alyansa ng mga Mamamayan para sa Sambayanan (SAMBAYANAN) sa atubang sang City Hall sining syudad.
Sa interview sang Bombo Radyo kay Ka Anthony Fabiona, SAMBAYANAN member, ginsiling sini nga ang ila mga miyembro ang anay miyembro man sang CPP-NPA-NDF apang tinutuyo nila sa karon nga pamatukan na ini bangud sa 53 anyos nga natukod ang terorista nga grupo wala ini sang maayo nga gindala sa pungsod.
Sa matuod, nagresulta pa ang ila mga buluhaton sang katublagan sa Pilipinas bangud sa ila ginahimo sa mga pumuluyo kapareho sang extorsion sa mga negosyante kag contractor, pagbomba kag pagsunog sa mga negosyo kag pasilidad, pagpangawat sa mga mangunguma nga yara sa nabukid kag malayo nga lugar ilabi na sa paggamit sang mga inosente nga kabataan nga naliko kag nasamad ang buwas damlag.
Tinutuyo suno diri sang ila pagprotesta ang ipakamalaut ang NPA kag ganyaton ang kabataan nga magpokus sa pag-eskwela kag likawan ang nasambit nga rebelde nga grupo.
Ginpahayag ni Fabiona nga wala sila sang nakita nga maayo nga resulta sa ginapakigbato sang terorista nga grupo, sa baylo makita nga wala sila sang kaayuhan nga madala sa Pilipinas.
Nagapasalamat naman siya nga amat-amat naman nga nabubuksan ang painu-ino sang pumuluyo kag naintindihan ang programa kag bulig sang gobyerno para sa mga nagbalik loob gikan sa terorista nga grupo.
