CAPIZ- Daku nga bulig kun makabig ang inisyatibo sang 1st Capiz Provincial Mobile Force Company (CPMFC) nga kabahin sang Capiz Police Provincial Office nga Project AMOMA sa mga pumuluyo sang probinsya sang Capiz.
Sa interview sang Bombo Radyo kay Police Lieutenant Colonel Lumyaen Lidawan, Force Commander sang 1st Capiz Provincial Mobile Force Company, ginpahayag nga ang Project AMOMA ukon “Aton Mangunguma, mangingisda kag mamumugon Organisahon Manggad nga dapat Amligan” ang isa ka programa nga naka aligned sa idalom sang Revitalized Pulis sa Barangay (R-PSB) sang Philippine National Police (PNP) kag mandato man sang Executive Order Number 70 ukon ang “Institutionalizing the Whole of the Nation Approach in Ending Local Communist Armed Conflict” agud mahatagan sang sabat ang mga isyu kag problema nga nagaluntad sa mga kabarangayan nga apektado sang sang mga Communist Terrorist Groups (CTG).
Dugang pa sini, ang Project AMOMA may yara na sang 54 ka mga myembro nga asosasyon kag 26 sini ang na-awardan na nga nag-umpisa sang tinalikdan tubtob subong nga Mayo 1, 2025 nga may kabug-usan nga balor P17,030,000 nga ginakalakipan sang 1,503 ka mga pamilya nga ginpunduhan sang Department of Labor and Employment Office (DOLE), Department of Social Welfare and Development (DSWD) kag Office of the Provincial Government kag iban pa nga mga stakeholders.
Nahibaluan nga base sa mandato sang Mobile Force bilang in-charge sang Internal Security Operation, isa sa kampanya nila amu ang Terrorism Awareness kun sa diin nagapatigayon ini sila sang mga community engagements kag dialogues activity nga nagresulta sa pagkanselar sang suporta sang 77 ka mga myembro sang Sectoral Front Organizations kag duha ka myembro sang Communist Terrorist Group (CTG) nga kasunod sang mga pagpang balay-balay nga pagbisita sang mga kapulisan.
Samtang, nagpalab-ot naman sang bulig ang 1st Capiz Provincial Mobile Force Company sa ila bilang suporta para sa bag-o nga pagpangabuhi.
