ROXAS CITY-Ginpasalig sang Provincial Director sang Capiz Police Provincial Office (CPPO) nga mangin patas ang imbestigasyon sang mga kapulisan natuhoy sa natabo nga pagbungguanay sang ambulansya sang Sigma Disaster Risk Reduction and Management Office kag Montero Sports nga ginkamatay sang duha ka mga frontliners kag ginkapilas sang apat ka iban pa sa National Highway sang Barangay Ondoy, Ivisan Capiz.
Ginpahayag ni Police Colonel Julio Gustilo Jr. sang mainterview sang Bombo Radyo nga ginmanduan sini ang hepe sang Ivisan Municipal Police Station nga maid-id nga imbestigaran ang natabo nga insidente agud matul-id kun sin-o ang may yara sang salabton sa natabo.
Apang aminado si Gustilo nga ind madali nga ma-establisar kun sin-o ang may yara sang salabton sa insedente bangud wala sang may nagatindog nga saksi.
Suno kay Gustilo nga isa sa mga usisaon sang kapulisan ang nagkalabilin nga mga debris sang tagsa ka mga salakyan agud mahibalu-an kun sin-o ang nagpang-agaw sang linya sa dalan kag nagbunggo.
Ginkompirmar ni Gustilo nga nakalab-ot na sa iya ang alegasyon nga indi si Police Captain Alcer Monsera ang nagamaneho sang nasambit nga salakyan.
Suno sa opisyal nga paga-usisaon sang mga otoridad ang mga pilas nga naangkon ni Monsera sa kalawasan agud matul-id kun naga santo ini sa kasamaran nga naangkon sang salakyan ilabi na sa driver’s seat.
Samtang ginpasalig man ni Gustilo nga wala sang whitewash nga matabo sa imbestigasyon bangud ginasiling nga miyembro sang PNP ang nadalahig sa insedente.
Matandaan nga patay ang driver sang ambulansya nga si Darius Yap kag pasahero sini nga frontliner nga si Ernie Fulgencio samtang nagapabilin sa ospital si Police Captain Alcer Monsera, Oliver Aguihap, Romelyn Baldado kag John Rey Castillon.
