Provincial director sang CPPO ginganyat ang anay kabulig nga nagaakusar sa anay alkalde sang Tapaz nga magpakita na sa publiko

ROXAS CITY – Ginganyat karon sang provincial director sang Capiz Police Provincial Office ang anay kabulig sang anay alkalde sang banwa sang Tapaz, Capiz nga magpakita na para mapamatud-an ang mga ginbuyagyag batuk sa anay employer.
Suno kay Senior Superintendent Samuel Nacion handa nga buksan sang pulisya ang kaso nga pagpatay kay ex Tapaz Vice Mayor Victor Gardoce kun may mapakita nga ebedensiya si Leomer Lapidez nga makapamatood nga si ex Mayor Romualdo Exmundo Jr., ang utok sa pagpapatay kay Gardoce.
Ginpahayag pa ni Nacion nga kun tan-awon, indi balasehan ang nangin pahayag ni Lapidez para matum-ok ang anay opisyal bangud wala sini masaksihan ang krimen ukon wala sang direkta nga partisipasyon sa krimen.
Samtang plano nga dugangan ni Exmundo ang ginpasaka nga kaso batuk kay Lapidez matapos akusahan ini nga bading.
Suno sa anay opisyal nga ginmantsahan ang iya nga pangalan kalakip na ang pangalan sang ila nga pamilya matapos ginpyestahan sa facebook ang mga akusasyon batuk sa iya ni Lapidez.