ROXAS CITY – Ginpatpat ni COMELEC-Capiz Provincial Election Supervisor Atty. Wil Arceño ang nahanungod sa pagbawal sang COMELEC sa substitution sang kandidato matapos mag-file ini sang certificate of candidacy.
Sa interview sang Bombo Radyo kay Atty. Arceño, ginpahayag sini nga ginabawal na sang COMELEC ang substitution pagkatapos mag-file sang COC ang isa ka kandidato kun ang rason lamang sini amu ang withdrawal sang iya kandidatura.
Gin-athag man ni Arceño nga pahanugutan lamang ang substitution kun ang kandidato nga nagpadalagan ang napatay ukon na-disqualify. Apang suno diri nga dapat pareho ang apelyido sang maga-substitute ukon miyembro ini sang ila partido.
Pahayag pa ni Arceño nga ginpatuman sang COMELEC ang amu nga pagsulundan bangud wala sang may nakit-an nga kaayuhan sa substitution.
Matandaan nga pareho nag-agi sa substitution si anay Presidente Rodrigo Duterte kag anak sini nga si VP Sara Duterte sadtong 2016 kag 2022 elections bangud ginatugutan pa sadto ang substitution by withdrawal.
Samtang, sa mga luyag naman nga mag-withdraw, ginpahayag ni Atty. Arceño nga mahimo ini himuon sang isa ka kandidato matapos mag-file sang COC tubtob election day.
Mahibaluan nga magasugod ang pag-file sang Certificate of Candidacy sa October 1 – 8, 2024 para sa May 2025 midterm elections.
