ROXAS CITY – Nagalaum ang provincial government nga maaprubahan sang Sangguniang Panlalawigan ang ila request nga ipaidalom sa state of calamity ang probinsya sang Capiz.
Ini ang ginpahayag ni Gov. Esteban Evan Contreras sang ma-interview sang Bombo Radyo.
Ginpahayag man sini nga nagpangayo na sila sang bulig sa Malacañang kag suno diri nga nagpasalig naman ang national government nga magahatag sang bulig ukon ayuda sa mga apektado sang pagbaha sa probinsya kag ini ang igadaretso na mismo sa kada kabanwahan.
Suno kay Contreras, sa karun nga may kalamidad kinahanglan gid ang pagbinuligay kag nagapangabay man ini nga ipaiway danay ang pamolitika apin man ukon kontra.
Ginasiguro man sini nga mahatagan sang bulig ang tanan nga mga pamilya nga apektado sang pagbaha.
Nag-abot man kahapon ang mga katapo sang PDRRMO Antique agud magbulig sa response operations sang probinsya, ilabi na sa mga mabudlay malab-ot nga lugar, bangud sa pagbaha nga tuga ni TD Agaton.
Matandaan nga nagpatigayon kahapon sang Aerial assessment sa mga apektado nga lugar sang bagyong Agaton ang provincial government kaupod ang katapo sang Philippine Air Force.
Mahibaluan nga sakay sa PAF’s black hawk amu sanday OCD VI officer-in-charge Ms. Aletha Nogra, OCD VI operations Section Chief Ms. Melissa Banias, kaupod ang 301st Commander Group VI Commander Lieutenant Colonel Pacordo, Governor Esteban Contreras kag PDRRMO head Mrs. Judy Grace Pelaez.
Sa karun, padayon man ang ila pagpanagtag sang mga relief goods sa mga apektado sang pagbaha sa nagkalain-lain nga mga barangay sa kada kabanwahanan.
