Gina-imbitahan ni Capiz Provincial Tourism Officer Al Tesoro ang publiko sa simultaneous opening sang Christmas village sa bilog nga probinsya sang Capiz sa palaabuton nga Disyembre 1, 2024.
Sa interview sang Bombo Radyo kag Mr. Alphonsus “Al” Tesoro, ginpahayag sini nga ang “Paskwa sang Maragtas: Capiz Christmas Festival” ang may konsepto nga masaulog pinaagi sa kaugalingon nga kultura sang probinsya. Ini man ang ginakabig sa karon bilang bag-o nga konsepto sa bilog nga pungsod bangud indi lang ini makita sa plaza, sakop man sini ang mga puluy-an, mga establisimento komersiyal kag sa mga dalanon sa bilog nga probinsya sang Capiz.
Dugang pa ni Tesoro, sa palaabuton nga Disyembre 1, sa pagpanguna ni Capiz governor Fredenil Castro, dululungan nga magasanag ang tanan nga mga kabanwahanan sa probinsya sa ila tagsa ka mga Christmas Villages nga gintukod. May tagsa man ini ka mga programa nga pagahiwaton.
Isa man suno ini ka paindis-indis, pagpasundayag kag panami-nami kun ano nga banwa ang may pinakamatahum kag madinuagon nga Christmas Village.
Ang nasambit nga aktibidad ang nagahatag sang bugal sa mga Capisnon nga sarang mapabugal sa iban nga lugar kag mga kapungsuran.
