ROXAS CITY-Ginakabig nga isa ka dako nga accomplishment sang isa ka pulis nga nagpanghatag sang mga grocery packs kadungan sang iya nga ika-48 nga kaadlawan sa Pilar, Capiz.
Sa interview sang Bombo Radyo sa kay Police Staff Sergeant Gerardo Buenvenida, PCAD-PNCO sang Pilar Municipal Police Station ginpahayag sini nga sa baylo nga magselebrar sa iya ika-48 anyos nga kaadlaw, ginpakaamayo sini magpanghatag sang mga grocery pack sa mga imol sa Sitio Bat-us, Barangay San Ramon, Pilar Capiz.
Suno sa kay Buenvenida nga naintindihan sini ang kabudlay sang sitwasyon sang mga imol bangud sang pandemiya.
Dugang pa sini, nga sang tinalikdan nga Enhanced Community Quarantine (ECQ), nagpanghatag man ini sang mga groceries sa mga kubos.
Samtang ginapasalig ni Buenvenida nga kun makatipon ini sang kwarta, mahatag man ini sang dugang nga bulig sa mga napilian sini nga benepisyaryo subong nga paskwa.
Mahibaluan nga kalakip sa mga ginpanghatag ni Buenvenida amo ang assorted nga sardinas, noodles, oatmeal kag noche buena packages.
