ROXAS CITY – Ginsulod kag ginkawatan ang ginarentahan nga hulot sang isa ka police officer sa banwa sang Pontevedra, Capiz.
Gintaban sang wala makilala nga kawatan ang 9mm service firearm kag magazine, cash nga P10,000 kag ang laptop ni Police. Lt. Roque Gimeno tumandok sang Molo, Iloilo, apang na-assign karon sa Pontevedra PNP.
Sa imbestigasyon sang Pontevedra Municipal Police Station nagaguwa nga wala nabatyagan sang nasambit nga pulis nga ginsulod na ang iya boarding house bangud mahamuok ang iya nga katulugon.
Nakibot na lamang ini nga sa iya pagbugtaw, nagaukay na ang mga kagamitan kag sa iya pagtsekyar, natukiban nga nadula na ang issued firearm nga 9mm, cash nga P10,000 kag laptop.
Natukiban nga nag-agi ang kawatan sa kaiping nga hulot sang pulis nga wala sang tawo.
Nagaguwa man sa imbestigasyon nga ang tiyangge sang landlady kuntani ni Gimeno ang plano nga kawatan sang kawatan, apang nabudlayan sila nga mabuksan ini, rason nga nagpangita sila sang iban nga makawatan sa diin natsambahan nga nakasulod sa kuwarto sang nasambit nga pulis kag ini ang ila nga nabiktima.
