Pilason ang isa ka pulis matapos ginbuno sang kaangay man sini nga pulis sa sulod sang Camp Crame sa Quezon City.
Base sa Criminal Investigation and Detection Group, ang biktima amo si Police Executive Master Sergeant Eric Castro samtang ang suspek amo si Police Senior Master Sergeant Michael Camillo.
Ang insidente natabo las 7:30 sang aga sa kusina sang Anti-Organized Crime Unit samtang ang mga personnel ang nagapreparar para sa preliminary investigation sa Quezon City Prosecutor’s Office.
Suno sa mga testigo, nagapamahaw sila sang nagsulod sa kusina ang restricted AOCU personnel nga si Castro, kag ginsundan ni Camillo.
Ginaalegar nga nagkuha sang kitchen knife si Camillo kag gilayon siya nga ginpunggan ni Castro pinaagi sa pagkupo sa iya.
Apang, natigayon nga mabuno ni Camillo si Castro sa likod.
Gilayon man nga gindala sa Philippine National Police General Hospital si Castro kag nagapabilin nga under observation.
Sa initial investigation, nagapakita nga las 5:30 sang aga, may yara na sang report nga naglain ang behavior ni Camillo.
Matapos ang insidente, nakuha sang otoridad sa crime scene ang kitchen knife kag subject ini sa forensic examination sang PNP Crime Laboratory.
Sa subong, si Camillo ang yara na sa kustodiya sang otoridad.
Naga-coordinate naman ang mga kapulisan sa Prosecutor’s Office sa pag-file sang nagakaigo nga kaso.
Natalana man nga magpatigayon sang medical kag psychological evaluations sa suspek.
