ROXAS CITY – Indi mabaton sang pila ka pumuluyo sang Barangay Bahit, Panay nga wala sila gindala sa listahan ni Barangay Kapitan Myerna Diosina, nga mangin benepisiaryo sa programa sang DSWD-Kalahi apisar mas kwalipikado sila ikumparar sa iban nga nalista.
Sa interview sang Bombo Radyo kay Jose Gary Dillera, isa sa mga pumuluyo nga nagareklamo, iya ginsiling nga may pinilian si kapitan Diosina sa iya ginpanglista bangud kalabanan diri iya mga kakilala kag duwa sa nalista ang himata sang barangay treasurer.
Ginkalain man sang ila buot bangud ginpahipusan ni kapitan ang nasambit nga programa sang DSWD kag hinali nalang ginpatawag sa barangay ang 88 ka indibidwal nga iya ginpili.
Kaina sang aga ginapahayag nagpatigayon sang assessment ang DSWD personnel agud tsekyaron kun nagatrabaho ang mga benepisiaryo, nagbantay naman ang mga tagreklamo agud magpabutyag kuntani sa DSWD, apang ginkalain pa gid sang ila buot bangud ginhambalan sila nga sa opisana sang DSWD sila magpadulong kag wala na ginsapak, suno diri kasubong nga gintapakan ang ila pagkatawo bangud imol lang sila.
Mahibaluan nga ginabulubanta masobra 500 ang populasyon sang Barangay Bahit apang 19 ka mga imol lamang ang nangisog magreklamo.
Dugang pa ni Barangay Kagawad Ronaldo Barrera, wala koordinasyon sa ila nga mga kagawad kag wala siya nakahibalo nga may nagakatabo nga nilistahanay.
Gintuad niya nga ginsukmaan niya si kapitan sa ila sesyon angut diri, apang suno sa iya ginsabat ni kapitan nga gin-intrigar ini sang DSWD-Kalahi sa iya nga makapagusto siya kun sin-o ang iya ilakip sa listahan.
Matigdas nga ginpahayag ni Dillera nga madamo sa listahan ang may ikasarang sa kabuhi kag indi kwalipikado.
Matandaan nga ang kwalipikado sa nasambit nga programa amu ang pinaka-kubos kag prayoridad man ang mga balik-probinsya, solo parents, kag nagalumon.
Panugyan ni Dillera kay kapitan amu man sa iban pa nga opisyales sang barangay nga ulikdon ang pumuluyo nga ginagutom kag matuod nga nagakinahanglan kag indi magpamulitika.
