ROXAS CITY – Ginsabat ni Punong Barangay Arthur Aragon ang pila ka mga reklamo sang mga pumuluyo natuhoy sa guba nga dalanon sa Sitio Crossing, Barangay Cagay, Roxas City.
Suno kay Aragon may pila ka mga motorista nga nagpalab-ot sang ila reklamo angut sa perwisyo nga dala sang guba kag kalain nga dalanon sa amo nga lugar.
Mahibaluan nga ang pamilya Ong may yara sang ginapakaayo nga subdivision sa isa ka Sitio sa nasambit nga barangay rason nga ginaalegar amat-amat nga nagakaguba ang karsada kun sa diin ginaagyan sang mga backhoe kag dalagkuan nga mga salakyan.
Ginpasalig man ni Aragon nga nagpakig-angut na ang pamilya Ong sa City Engineer’s Office kag ginpasiguro nga ipakaayo ang tanan nga nagkalaguba sa dalan.
Gindugang pa ni Aragon nga ginapatambakan man sang buga ang halos nagadalum nga parte sang dalan apang natyempuhan lamang nga pila na ka adlaw ang pag-ulan-ulan.
Ginkatingala man sini ang hinali nga pagdamo sang mga dalagkuan nga mga salakyan nga nagapadulong sa lugar kun sa diin nagadugang sa pagkaguba sang dalan.
