ROXAS CITY – Ginpanindugan ni Punong Barangay kag subong man administrador sang Nemecio Tan Lanholdings Ferdinand Bacanto, nga balasulon ang Department of Agrarian reform (DAR) sa mga nagluntad nga problema sa tunga sang tag-iya sang duta kag sang Agrarian Reform Beneficiaries (ARB’s).
Sa interview sang Bombo Radyo kay Bacanto, ginsiling sini nga ginpaawat-awatan sang DAR ang ginahinyo sini nga sertipikasyon agud mapasugtan ang mga ARB’s nga magharvest sang ila produkto, nga suno sa administrador, sang Nobyembre 2022 pa sini ginhinyo.
Dugang pa sini, wala man ginhinyo sang ARB’s ang opisyal sang DAR nga mahatagan sila sang sertipikasyon, bangud wala man sang problema nga mag-ani basta may yara gid lamang nga dokumentasyon, apang na-misinterpret suno diri sang kapitan ang iya pag-istrikto, rason nga nagakahinabo ang kinagamo.
Ginpahayag man ni Bacanto nga wala ini nagahingabot sa produkto, indi lang sini luyag nga angkunon na ang duta nga indi pa sang panag-iya bangud may kaso pa sa Korte.
Pag-abot naman sa pagkapiyerde sa patubas sang mga ARB’s, ginsiling ni Bacanto nga iplastar nila ang ‘justification’ kun ang Nemecio Tan Landholdings ang ila ginabasol nga may kahimuan, bangud wala sang problema.
Likawan man kuntani sang mga ARB’s nga mag-post sa social media sang mga wala sang kamatuoran nga impormasyon nga nagapadugang lang sa kinagamo.
