ROXAS CITY – Ginklaro ni Barangay Kapitan Elect Wenie Batuampo nga wala sang may natabo nga komosyon sa tunga nila ni Carmen Andrade kahapon nga adlaw Nobyembre 13, 2023 sa Barangay Hall.
Sa interview sang Bombo Radyo kay Punong Barangay Batuampo, ginpahayag sini nga kahapon nga adlaw nagapatigayon sila sang pagturn-over sang tanan nga mga papelis sang ila barangay sa tanan nga mga nagdaug nga opisyales.
Suno kay Batuampo, sang nag-abot siya manugtapos na ang pagkay-o sang mga papelis.
Didto na suno diri nagsugod nga mag-istorya si Andrade sa iya kung sa diin masiling sini nga daw indi instakto nga tyempo bangud sadto nga tion madamo sang tawo kung sa diin yara ang tanan nga mga opisyal sang ila barangay kaupod ang SK Chairman kag mga SK Kagawad sini.
Ginpahayag man sini nga antes paman ang eleksyon una na sila suno diri naghinala sang utod ni Andrade angut sa isyu sang duta nga ila ginapatindugan sang ila puluy-an.
Angut sini, ginklaro sang nasambit nga Punong Barangay nga wala sang komosyon nga natabo sa ila ni Andrade bangud nagpaguha lamang ini suno diri sang kalain sang iya buot.
Matandaan nga antes paman ang pagpiniliay sadtong tinalikdan nga Oktobre 30, ginpatawag ini agud istoryahon nga pahalinon sila sa ila ginatiniran bangud ginapahayag nga nag-upod si Batuampo sa pihak nga partido.
Apang lipod sa ihibalo sini nga may yara sang indi pag-intindihanay sa pamilya nanday Andrade kag sa partido nga iya gin-updan apang ginpakamaayo na lamang niya suno diri nga maghalin sa amu nga duta.
Sa pihak sang mga tinaga nga ginpanghambal ni Andrade batuk sa iya ginbaton na lamang niya ini suno diri kag himuon kung anu ang maayo sa tanan agud wala na sang kinagamo nga matabo.
