Ginsabat ni Punong Barangay Jobby Nalica sang Barangay Libas ang reklamo sang pila ka residente nga wala nakabaton sang bugas sa ginpatigayon nga distribusyon sang Department of Social Welfare and Development (DSWD).
Sa interview sang Bombo Radyo, ginpahayag ni Nalica nga may yara sang 300 ka pumuluyo nga nadula sa listahan sang benepisyaryo, apang indi ini desisyon sang iya opisina kundi sang DSWD mismo.
Suno sa iya, ang mga ginpangkuha nga ngalan gina-revalidate pa subong sang ahensya agud masiguro nga kwalipikado guid kag nagakinahanglan sang ayuda.
Dugang pa ni Nalica nga ginpanagtag ang bugas sa sulod lang sang duha ka adlaw nga gintalana sang DSWD, gani ginmanduan niya ang mga Barangay Health Workers (BHW) nga ipahibalo sa mga residente nga magpadulong sa barangay hall agud makakuha sang ticket nga kinahanglan ipakita antes makabaton sang bugas.
Gin-athag man sang Punong Barangay nga ang mga sobra nga bugas nga wala naipanghatag ginkuha na liwat sang DSWD kag ginbalik sa ila opisina.
Panugyan ni Nalica nga indi dapat sila nga basulon bangud sila nagatuman lamang sa proseso kag wala sini ginalaktan sang pamulitika ang pagpanagtag sang bulig sa mga pumuluyo.
