ROXAS CITY, CAPIZ- Gin-athag ni Punong Barangay Jobby Nalica sang Barangay Libas, Roxas City, Capiz, ang mga reklamo nga ginahaboy batok sa iya ni Mr. Joel Soberano.
Sa interview sang Bombo Radyo kay Nalica, iya ginpahayag nga ang mga pumuluyo nalang suno sa iya ang magsabat kag magbinag-binag kun matuod ayhan ang mga alegasyon nga ginahaboy batok sa iya.
Suno sa iya, ang ginareklamo ni Soberano nga kanal ukon imburnal nga yara sa iya nga area, ang may yara na sang ginadihon nga aksyon bangud nga pag-islan ini kag bag-uhon agud nga indi magbara sa tion sang tag-ululan sa diin nga ginabulubanta sa bulan sang Setyembre tubtob Oktubre ma-implementar ang amo nga aksyon bangud nga ginaagut pa ini sa City Government.
Dugang pa ni Punong Barangay Nalica, nga ang pagbaligya sang mga appliances kag motorparts sa ila nga barangay outpost ang may yara sang renta –nagbayad ang nag-akupar sang amo nga outpost sang balor P2,000 sa sulod sang lima ka-adlaw kag ang ini nga kantidad ang otomatiko nga ginpasulod sa income-generating program sang ila nga barangay.
Pag-abot naman sa mga nagabaligya sa Purok 1, ginsiling ni Punong Barangay Nalica, nga wala pa sya makapungko sa pwesto bilang Kapitan, yara na ang mga ini nagabaligya kag sa adlaw lang man sang Dominggo nga sa diin para sa iya, isa man ka maayo nga lihok agud nga makabenepisyo ang tagsa ka mga pumuluyo kag wala ini ginapabayad sang barangay ang mga manugbaligya –libre ang pagbaligya sa amo nga bahin.
Hugot man nga ginsiling ni Punong Barangay Nalica, nga pag-abot sa pag-roving sang ila nga mga tanod, wala gid ini nagapabaya kag naga-utidtid gid ini sa pagpabiling sang kalinong kag katawhay sa palibot, apang maya yara lang man sila sang 16 tanan ka mga tanod sa diin nga gakatunga ang pagdesignar sini kag pagbantay. Walo sa aga, walo man sa gab-I kag ginaupad ini sang duwa ka man ka mga konsehales sa kada pag-roving sa diin suno kay Kapitan, normal lang nga nagalakat-lakat ang mga ini kag indi nagatinir sa isa lang ka kanto.
Samtang, ginpanginwala ni Punong Barangay Nalica nga ginpatawag nya si Robles sa barangay, apang ginsiling sini nga kun nakapadulong gid man si Robles sa amo nga talatapan ini bangud sa ginpalab-ot man nga reklamo sang mga kaluyo sini nga mga panimalay. Sa diin, ginsiraduhan ni Robles ang dalan nga ginaagyan sang mga umilistar nga yara sa 50 ka mga panimalay nga kaluyo sini. Apang suno kay Punong Barangay Nalica, wala man ini sya sang kun ano nga pagpangsita bangud nga propedad ini ni Robles. Bilang aksyon, ginhatagan sang madasig nga aksyon ang amo nga reklamo pamaagi sa pagpahamtang sang footwalk sa pihak nga bahin nga mahimo maagihan sang mga naapektuhan.
Wala naman suno sang kaakig si Punong Barangay Nalica kay Robles, kag bukas ini nga makighinun-anon. Magpadulong lamag si Robles sa talatapan sini agud mahatagan sang nagakaigo nga igtalupangod ang amo nga isyu.
In an interview with Bombo Francis Biñas
