ROXAS CITY – Nagparekord sa Roxas City Police ang punong barangay sang Barangay Lonoy sining siyudad matapos nga wala nag-upod sa Roxas City Emergency Response Team ang 42-anyos nga babayi nga napositibo sa COVID-19.
Sandig sa ginpabalhag ni Punong Barangay Ferdinand Valles ginaalegar sini nga kapin isa ka oras nga naghulat ang mga katapo sang RCERT nga nagsugat sa nasambit nga babayi agud dalhon kuntani sa quaratine facility apang wala ini nagguwa sa ila nga panimalay.
Ginaalegar man ni Valles nga posible nakaguwa sa ila nga balay ang nasambit nga babayi antes nag guwa ang resulta sang iya RT-PCR test.
Bangud diri, ginpakamaayo na lamang ni Valles nga ipabalhag sa Roxas City Police Station ang insidente matapos nga gin-abisohan man ini ni City Mayor Ronnie Dadivas.
