ROXAS CITY – Aminado ang kapitan sang Brgy. Punta Tabuc nga problema ang iligal nga druga sa ila barangay ini matapos nga madamo sang nagkaladakpan nga naga-usar sang iligal nga druga.
Ini ang ginkumpirmar ni Punong Barangay Nestor Buenviaje sang Brgy Punta Tabuc, syudad sang Roxas sang ma-interview sang Bombo Radyo.
Suno kay kapitan, madamo nga mga pumuluyo ang nagareklamo bangud sa guwa-sulod sang mga indi residente sang ila lugar tubtob maga-aga na.
Matandaan sang damlag lang, nagpatigayon sang buybust operation ang mga otoridad sa amo nga barangay, kun sa diin lima ka mga persona ang nadakpan kag nakapalagyo ang ginakabig nga high value target kag supplier sang iligal nga druga sa probinsya sang Capiz nga ginkilala kay Marlon Bergantinos.
Dugang pa ni Buenviaje, nga imposible pa sa karon nga mabutang ang ila barangay sa drug cleared barangay bangud may yara man sa gihapon nga gina-monitor nga naga-gamit kag nagabaligya sang iligal nga druga.
