ROXAS CITY, CAPIZ- Ginpa-bombo sang isa sa mga pumuluyo sang Barangay Libas, Roxas City, Capiz, ang ila nga kapitan nga si Punong Barangay Jobby Nalica.
Sa interview sang Bombo Radyo kay Mr. Joel Soberano, ang nasambit nga tagreklamo, iya ginpahayag nga madamo sang kakulangan nga aksyon ang ila sini nga Punong Barangay.
Suno sa iya, umpisa nga nagpangalagad si Punong Barangay Nalica, wala ini sang may hinimuan sa ila nga barangay.
Ginareklamo ni Soberano ang sitwasyon sang ila nga lugar sa diin suno iya, kaangay nga nahimo na nga balaligyaan sang pila ka mga manugbaligya ang footwalk, ang imburnal nga napahamtang sa higad sang ila nga kalye, wala ginatabunan nga sa diin suno sa iya madamo na sang mga motorista ang nagaka-disgrasya kag kabangdanan sang pag-angkon sang balatian nga dengue sang iya nga apo.
Ginareklamo man sini ang tanod outpost nga sa diin nahimo na nga balaligyaan sang mga appliances nga para sa iya indi nagakadapat bangud nga propedad ini sang gobyerno. Subong man ang mga naka-open muffler sa diin nga wala mahatagan sang aksyon ni Kapitan.
Pahayag pa ni Soberano, sa tungod sang ila nga puluy-an, wala ginalimpyuahan ang kanal, apang pag-abot sa iban nga bahin ginalimpyuhan man.
Luyag sini nga makahinun-anon si kapitan Jobby Nalica, agud mahatagan sang kaathagan ang sitwasyon sang mga reklamo nga iya ginpakigbahin.
Samtang, bukas naman ang istasyon sang Bombo Radyo para sa pagpa-athag sang ginpa-bombo.
In an interview with Bombo Sunnie Mae Constantino Batencila
