ROXAS CITY – Nakalab-ot na sa igtalupangod ni Punong Barangay Dino Detablan ang reklamo sang pila ka pumuluyo nga plano sang iya barangay kagawad nga buhinan sang tig-P300 ang mabaton nga P5,000 sang mga benepisyaryo sang Department of Agriculture (DA).
Sa interview sang Bombo Radyo kay Barangay Kapitan Detablan, ginpahayag sini nga may nagreklamo naman sa ila talatapan nga plano sang iya Brgy, Kagawad kag nagaserbe presidente sang farmer’s organization nga si Brgy, Kgwd. Milagros Senita, ang nasambit nga pagpangbuhin.
Bangud sini, iya nga igapatawag ang amu nga kagawad kag hibaluon kun ano ang gin-kasugtanan sang mga ini sa ginpatawag nga pagsinapol sang Pebrero 12.
Suno pa sa Kapitan, nga gintugyan na niya ang responsibilidad kay Kgwd. Senita bangud ini ang chairman sang committee on agriculture.
Aminado man ang Punong Barangay nga madamo sang mangunguma ang wala madala sa makabaton nga financial assistance sa Pebrero 25, kag isa na ini sa indi makabaton.
Ginpasalig sang Barangay Kapitan nga iya pagapakig-angutan si Kgwd. Senita kag pagahinalaan sang ila konseho sa ila palaabuton nga sesyon.
