ROXAS CITY-Ginsabat sang Punong Barangay sang Barangay Cabugao Este Panay, Capiz ang ginaalegar kinagamo nila ni Barangay Kagawad Rosellier Late sa nasambit nga barangay.
Sa interview sang Bombo Radyo Roxas kay Punong Barangay Tomas Borreros ginpahayag sini nga iya nga nakibot sang may nagpahibalo sa iya nga nagatuga sang kinagamo si Kagawad Late sa ila nga Barangay Hall kun sa diin ginapamahog kag ginapangmulay sini ang mga iban nga mga barangay officials kag nagapangbangga sang mga nagalabay nga mga motorsiklo.
Suno kay Borreros nga gin-istorya sini sang matawhay si Late apang maisog pa ini nga ginhangkat sang Kagawad kag ginmulay sa iya nga atubangan.
Ginpahayag ni Borreros nga ginsinggitan pa ini ni Late nga kasubong wala ini sang pulos nga sahi sang Kapitan.
Dugang pa sini nga wala man ini sang may nadumduman sang lainay sang buot sa tunga nila ni Late kag ginkakibot ang hinali nga pagmaoy sini.
Apang aminado si Borreros nga ulugtasan nga sahi sang Kagawad si Late bangud man sa pila ka mga reklamo nga nabaton sini nagikan sa mga pumuluyo kaparehus na lamang sang pagpasaway sini sa pagsuksok sang facemask sa tion nga yara sa pampubliko nga lugar kag pagpamukaw sa mga tindahan sa tion sang kagab-ihon agud magbakal sang makahulubog nga ilimnon.
Bangud sa natabo, nagdesisyon si Borreros nga pasakaan sang panumbungon si Late para man sa nagakaigo sini nga disposisyon.
