ROXAS CITY – Indi na luyag si Punong Barangay ‘Boyet’ Bonilla sang Poblacion, Pilar, Capiz nga maliwat pa ang natabo nga pagka-ospital sang anum sini ka mga residente nga kadam-an kabataan, sang nagligad nga tuig, bangud sa pagkaon sang panginhason nga nagikan sa ila kalalawran.
Sa interview sang Bombo Radyo kay Bonilla, ginpahayag sini nga hugot sa gihapon nga ginabawalan sa karon ang pagharvest, pagbaligya kag pagkaon sang bisan ano nga sahi sang panginhason san ila lugar, bangud sandig sa pinakaulihi nga datos sang BFAR-VI, nagaguwa sa ila pag-eksamin nga positibo sa gihapon sa red tide toxin ang ila kadagatan.
Bangud sini, ginpaintidndi sini sa ila mga residente ang mahimo resulta kun magapalusot sa pagbaligya ang mga ini.
Aminado man ang Punong Barangay nga bangud sa kapigaduhon may pila ka mga residente nga patago nga nagakaon sang panginhason.
Samtang, nagpasalamat man si Bonilla sa provincial government sa bulig nga ginpalab-ot sa mga apektado sang red tide outbreak sa ila barangay.
