ROXAS CITY – Hugot ang ginapatigayon nga monitoring sang mga Punong Barangay sang Poblacion Tabuc Norte kag Ilawod sa ila mga pumuluyo nga apektado sa pagkatiphag sang duta sa suba, sa banwa sang Panit-an.
Sa interview sang Bombo Radyo kay Barangay Kapitan Freddie Dela Rosa sang Poblacion Tabuc Norte, nga sa karon may yara na sang 14 ka mga puloy-an ang apektado sa pag-ab-ab sang duta bangud sa naguba nga river control.
Nagapanawagan man ini sang gilayon nga aksyon sa nasambit nga sitwasyon sang suba bangud madamo sang iya residente nga apektado.
Kaangay nga tikang ang ginapatigayon ni Punong Barangay Romeo Cabidog sang Poblacion Ilawod, kun sa diin ginpaalerto na sini ang ila mga barangay officials nga i-monitor ang mga puloy-an malapit sa suba bangud sa nagalapad nga pagkatiphag sang duta.
Nahibaluan nga ginkordon na ang apektado nga lugar sa palibot sang suba agud magserbe paandam sa mga pumuluyo nga delikado ini teniran.
