ANCHORAGE, ALASKA — Nag-atubangay sa isa ka maragtason nga summit sanday Presidente Donald Trump sang Estados Unidos kag Presidente Vladimir Putin sang Russia sang Biyernes agud talakayon ang kapalaran sang Ukraine, sa tunga sang nagapadayon nga gyera nga ginhingadlan nga pinakamadugo sa Europa umpisa pa sang Ika-duha nga pagkalibutanon nga kinagamo.
Mainit ang nangin pag-abi-abi sang duha ka lider saang nag-abot si Putin sa isa ka base sang US Air Force. Nagkamustahanay sila sa pula nga alpombra kag nagtapikan pa sa abaga antes nga nagsakay sa limousine ni Trump padulong sa lugar sang pagsinapol.
Ang summit ginpatigayon sa isa ka pasilidad malapit sa base militar, kun sa diin lunsay nga nakapungko sanday Trump kag Putin kaupod ang ila nga mga opisyal. Sa likod nila ang isa ka blue nga backdrop nga may nakasulat nga “Pursuing Peace,” nga nagasimbolo sa katuyuan sang pagsinapol.
Ini ang una nga kahigayunan nga nag-atubangay liwat ang duha ka mga lider halin sang 2019.
Samtang, tuman ang pagkabalaka ni Presidente Volodymyr Zelenskiy sang Ukraine kag sang mga kaalyado sini sa Europa, bangud wala siya gin-imbitar sa nasambit nga pagsinapol. Nagakabalaka ang mga ini sa posibilidad nga ipaiway ni Trump ang interes sang Ukraine kag pasugtan ang de facto nga pagkontrol sang Russia sa mas ukon menos one-fifth nga bahin sang teritoryo sang Ukraine.
Sa iya nga bahin, gintistingan nga pahagan-haganon ni Trump ang mga pagkabalaka antes nagsakay sa Air Force One.
“I’m not here to negotiate for Ukraine, I’m here to get them at a table.” suno kay Trump
Padayon nga nagalaom ang international community nga magresulta sa kalinong ang nasambit nga diyalogo sa tunga sang duwa ka mga makusog nga lider.
