ROXAS CITY – Nagapanghuyhoy na naman ang abaga sang mga PUV drivers sa liwat nga pagpatuman sang oil price hike sang mga kompanya sang gatong.
Mahibaluan nga ini na ang ika-8 nga semana nga may pagtaas sa presyo sang gatong kun sa diin ang presyo sang gasolina ang may pagtaas sang P0.80 kada litro, diesel P0.65 kada litro kag ang kerosene nga may P0.45 kada litro.
Sa interview sang Bombo Radyo Roxas kay Geovane Mayabason, isa sa mga jeepney driver nga nagabyahe Panitan-Roxas vice versa, ginpahayag sini nga pigado katama ang ila kita bangud sa pagmahal sang korodo kag dugangan pa nga wala sang madamo nga pasahero.
Dugang pa sini nga ang iya kita ang insakto lang nga ibakal sang korodo kag sud-an para sa iya pamilya.
Aminado man ini nga ahaton pa sila nga makabakal sang bugas.
Nagapangabay man ini nga kuntani panubuan man ang presyo sang gatong agud makabawe man sila sa ila nga kita.
