Nagpagwa sang emergency alert ang Interior Ministry sang Qatar kag nagpanugyan sa publiko nga likawan ang mga military site kag magpabilin sa sulod sang balay kasunod sang nagalala nga tensyon sa rehiyon.
Suno kay Bombo Elly Tejada, international correspondent sa Doha, ginpaandaman na sila nga indi magpalapit ukon magtandog sang anuman nga wala matumod nga debris kag gilayon ini nga i-report sa otoridad.
Suno kay Tejada, ginpahayag sang Ministry of Defense sang Qatar nga madinalag-on sini nga na-intercept ang second wave of attacks nga nagpuntirya sa pila ka mga lugar sa pungsod.
Suno sa ahensya, na-intercept ang tanan nga missiles antes ini nakalab-ot sa teritoryo sang Qatar.
Ginhatagan niya sang importansya nga nagakabalaka pa siya sa nagapadayon nga tensyon sa tunga sang Iran kag Israel nga nagtuga sang mabaskog nga paglupok sa pila ka mga pungsod sa Middle East.
Suno sa iya, nagabatyag na siya sang kahadlok kag trauma bangud sa mga lupok nga iya nabatian.
Sa pihak sang tensyon, nagapadayon sa gihapon ang pila ka trabaho sa lugar apisar nga may mga pamahog sang pag-atake.
