Natalana nga magpadala sang sulat sa konseho sang siyudad sang Roxas ang presidente sang Roxas City Tricycle Operators and Drivers Association ukon RCTODA sa ginahinyo nga pagpasaka sang pagsuluktan sa pamasahe sang mga tricycle.
Ginpahayag ni RCTODA President Wilson Devela nga ginhinyo sini nga P20 kada 2 ka kilometros kag dugang P5 sa succeeding kilometers ang sukton sang mga tricycle driver sa mga magasakay nga mga pasahero.
Gin-athag ni Devela nga indi makasustiner ang P8 nga pamasahe sa isa ka tricycle driver bangud isa gid lamang ka pasahero ang ginapasugtan nga magsakay agud mapatuman ang social distancing.
Ginpanindugan ni Devela nga nagakahilanglan man nga mahangpan sang riding public ang sitwasyon sang mga tricycle drivers nga nag-untat sa pagbiyahe sang tinalikdan nga bulan bangud sang enhanced community quarantine (ECQ).
Samtang ginatugyan na lamang ni Devela sa konseho sang siyudad ang pagdesisyon sini apang nagalaum ini nga pagapaboran sang konseho ang ginaapelar sang mga tricycle drivers kag operators.
