ROXAS CITY – Hantup nga pagpasalamat ang luyag ipalab-ot ni re-elected Mayor Felipe “Ipe” Yap, sa mga pumuluyo sang Ivisan, matapos nga ginhatagan ini sang liwat nga kahigayunan nga magpungko bilang alkalde.
Sa interview sang Bombo Radyo kay Yap, ginpahayag sini nga pagapadayunon sini ang mga naumpisahan nga programa kag proyekto sa ila banwa.
Nakalinyada na suno diri ang pagpakaayo sang nabilin nga inugpasemento nga dalan sa mga Sitio kag Barangay.
Subong man, programa sa medikal para sa mga Ivisanon kag pagpasanyog sa environment ang nadala sa prayoridad nga proyekto ni Yap.
Nagalaum man ini nga mangin mahupos ang pagpatuman sang proyekto sa ila banwa, ilabi na nga kapartido sini ang Governor-elect nga si Congressman Fredenil ‘Oto’ Castro kag ang Congresswoman-elect sa segundo distrito nga si Baby Jane Castro.
Nahibaluan nga ang second termer nga si Yap ang abanse sang 4,414 nga boto batuk sa iya kasumpong nga si Zeny Chapman sang PDP Laban.
