ROXAS CITY – Nagpasalamat ang alkalde sang Maayon sa mga pumuluyo nga nagbulig kag padayon nga nagasalig sa iya tampad nga pagserbisyo.
Ini ang ginpahayag ni re-elect Mayor Raymond ‘Mon-mon’ Malapajo sang ma-interview sang Bombo Radyo.
Suno kay Malapajo, nagapati siya nga bangud sa iya manami nga rekord, madasig palapitan kag mga proyekto nga hinimuan sa ila banwa, ini ang nagtulod sa mga tawo nga ipabilin siya sa pwesto.
Ginpahayag ni Malapajo, nga kun gintutukan lang nila ang tatlo ka SB members sa ila partido na landslide gid ang ila kadalag-an.
Gintuad sini nga gintutukan nila ang pagkampanya sa iya ka-tandem nga si Jose Dapulaza bangud mapag-on ang kasumpong sini.
Aminado man si Malapajo nga bilang miyembro sang Liberal party, gintinguhaan gid niya nga mabuligan sa ila banwa ang nagdaog nga gobernador, bise gobernador kag congressman.
Dugang pa sini, nga nakabugtaw na ang mga tawo sa nagakahinabo nga korupsyon gani ini ang nag-upod kag nagsuporta sa ila nga partido kag luyag na sang pagbag-o sa bug-os nga probinsya.
Mahibaluan, ang banwa sang Maayon ginakabig nga balwarte sang ila kasumpong.
Nagpasalig naman si Malapajo sa iya mga kasimanwa nga padayunon niya ang iya maayo nga pagserbisyo kag lauman ang panibag-o nga mga proyekto nga iya igatukod para sa kaayuhan sang ila nga banwa.
