ROXAS CITY – Tuman ang pagpasalamat sang re-elected Mayor sang banwa sang Tapaz sa mga pumuluyo nga nagbulig kag padayon nga nagasalig sa iya maayo nga pagserbisyo agud ibutang siya liwat sa nasambit nga pwesto.
Ini ang ginpahayag ni Mayor Roberto Nonong Palomar, sang ma-interview sang Bombo Radyo.
Suno kay Palomar, ang pagboto sang mga pumuluyo sa iya nagapakita lang sang senyales nga maayo ang iya pag-administrar sa ila banwa.
Mahibaluan, nga ini na ang ikatatlo kag ulihi nga termino ni Palomar.
Sa pihak sang iya kadalag-an, nasubuan man si Palomar bangud napaslawan ang iya ka-tandem nga si Fe Gardose sa pagka-vice mayor kag may yara sila sang duwa ka SB members nga wala nakasulod.
Apang, suno diri wala na sila sang mahimo kundi respestuhon ang boto sang mga pumuluyo.
Base sa iya pag-monitor bilang amay sang banwa, ginpahayag sini nga generally peaceful gid ang ginhiwat nga eleksyon bangud una nila nga ginhatagan sang pagtamod ang peace and order sa nasambit nga munisipalidad. Nagpasalig man si Palomar sa mga Tapaznon nga ipadayon niya ang iya maayo nga pagserbisyo agud mabalik niya sa mga pumuluyo ang suporta nga ginhatag sini sa iya.
