WESTERN VISAYAS – Ginkalipay ni Fire Chief Supt. Edwin Vargas, Regional Director sang Bureau of Fire Protection 6, ang nabaton nga pagkilala sang talatapan bilang Second Best Performing Region sa paghiwat sang Fire Prevention Month 2026 kag Community Relations Week.
Sa interview sang Bombo Radyo kay Vargas, iya ginpahayag nga ang pasidungog amo ang pagkilala sa madinalag-on nga pagpatuman sang BFP Region 6 sang mga programa kag inisyatibo para sa ihibalo sang publiko may kaangtanan sa saguridad batuk sa sunog.
Suno sa regional director, ang kadalag-an ang bunga sang dedikasyon, maayo nga pagpangalagad kag pag-ugyon sang kada opisyal sang BFP Region 6, lakip na ang padayon nga suporta sang mga local government units, partner agencies, volunteer organizations kag iban pa nga stakeholders.
Nagpasalig si Fire Chief Supt. Vargas nga magaserbe nga inspirasyon ang pagkilala agud mas ma-improve pa ang paghatag sang dekalidad nga serbisyo para sa publiko.
