Ginabantayan sang Philippine National Police (PNP) ang ginapahayag remnants sang una na nga nabungkag nga private armed group (PAG) sa Negros Oriental.
Ang nasambit nga grupo, suno sa PNP, ang posible nga magabalik sa May 2025 midterm elections.
Ginapatihan sang pulisya nga tubtob anom ka miyembro sang nasambit nga grupo ang nagpalagyo kag nagpanago sa nagkalain-lain nga bahin sang probinsya matapos ang pagkabungkag sang ila nga grupo.
Ang mga ini ang ginaimbestigaran bangud sa potensyal nga pagkaulamid sa pagpangluthang sadto kay former Negros Oriental Governor Roel Degamo kag siyam ka iban pa.
Involved man suno diri ang mga ini sa nagkalain-lain nga serye sang mga pagpangluthang sa nasambit nga probinsya, kalakip na ang pila ka election-related shooting incident.
Kaupod sang PNP ang National Bureau of Investigation (NBI) nga nagabantay sa posible nga pagbalik sang amu nga grupo.
Sa pihak nga bahin, gin-report sang local police nga wala pa sang na-monitor nga report angut sa mga gun-for-hire individual nga posible nga magtuhaw sa Negros Oriental sa kasagsagan sang 2025 midterm elections.
