ROXAS CITY – Aprubado na sang Sangguniang Bayan sang Cuartero ang resolusyon nga nagahatag sang gahum sa ila local chief executive nga mag-utang sang P50 million sa bangko para sa pagbakal sang equipment.
Ini ang ginkumpirmar sang ila alkalde nga si Mayor Joemarie Openiano, sang mainterview sang Bombo Radyo.
Suno kay Openiano, ang paghinyo sang pila ka pumuluyo sa nabukid nga bahin sang ila banwa nga mapakay-o ang dalan ilabi na ang mga Pedi roads kag farm to market roads ang rason nga ginplastar sini sa municipal development council, ang amu nga plano nga pagbakal sang equipment kag suno diri nga unanimously approved man sang amu nga konseho.
Agud mapatuman ini nga proyekto, nagakinahanglan sila sang dako nga pondo, kag bangud wala man sang naga-eksister nga utang ang ila LGU sa sulod na sang kapin napulo katuig, nadesisyunan nga magautang ang ila banwa sa DBP kag sa karon aprubado na sang ila Sanggunian ang ini nga hinyo pinaagi sa pagpapasar sang amu nga relsolusyon.
Sa tion nga mapatuman, pagabayran sang LGU-Cuartero ang P50-M sa sulod sang pito katuig, kun sa diin kada quarter P900,000 ang ila mangin bayad, nga pagakuhaon sa ila 20% fund.
Ginsabat man sang alkalde kun ngaman P50 million ang ginbulubanta nga kantidad, ini bangud suno diri magabakal sila sang branded nga grader, excavator kag road roller, samtang puwede na nga made in China ang self-loading kag dump truck, kag ba-se sa ila initial canvass, magalab-ot sa nasambit nga kantidad ang kinahanglanon, apang depende pa ini bangud wala pa sang pre-bidding nga natabo sa supplier.
Mensahe sini sa mga Cuarteronhon nga indi basta-basta magpati-pati sa ginaalegar overpricing, bangud may ahensya ang gobyerno nga amu ang magalantaw kun overpriced ang mga pagabaklon nga proyekto sang ila banwa.
