Ginpaguha na sang Philippine National Police – Anti-Cybercrime Group (PNP-ACG) ang resulta sang ginhimo sini nga digital forensic examination sa mga nakumpiska nga gamit sang isa ka Chinese nga naaresto sadtong bulan sang Mayo sa Makati City.
Ang nasambit nga Chinese, nga ginkilala bilang si Yuhang Liu, ang ginapatihan nga espiya, suno naman sa mga nakumpiska nga laptop, cellphone, military-grade electronic gadgets, kag mga armas.
Suno sa report sang nasambit nga police unit, nakuha-an sang linibo ka mga ginapatihan nga mga laragway kag mga video ang mga nakumpiska nga electronic gadget sang suspek.
Nakitaan man ang mga cellphone sini sang mga makaduluda nga mga software kag applications, database, logs ukon listahan sang mga ginatawagan, kag iban pa nga file documents nga nagakinahanglan sang dugang nga imbestigasyon.
Gin-abot ang nasambit nga police unit sang 40 ka adlaw bag-o matapos ang ginahimo nga digital foreinsic exam bangud naman suno sa kadamu sang mga nagaguha nga impormasyon.
Suno sa PNP-ACG, bastante na ang mga ini agud pasakaan sang kaso ang suspek sa paglabag sa Cybercrime Prevention Act of 2012.
Nakatalana man nga magfile sang reklamo sang espionage ang pulisya batuk sa ila, bangud man sa mga nakumpiska nga ebidensiya.
Sadtong pinakaulihi nga semana sang Mayo, ang una nga naaresto si Liu sa Finlandia Street corner Codornico Street sa Barangay San Isidro, Makati City matapos siya nga ginreklamo sang pagpanutok sang armas luthang.
Sang magresponde ang pulisya nadatnan ini nga may dala-dala nga pusil apang wala sang maipakita nga nagakaigo nga lisensiya.
Matapos siya nga kapkapan nakuha-an siya sang mga antenna system, battery units, solar inverter, radio receiver/transmitter, router, tablet, mobile phones, cash, kag mga armas.
